Научници открија молекуларен сигнал во цревните клетки кој може да остане присутен и кога воспалителната болест на цревата (IBD) е во ремисија. Овој „тивок“ дефект ги прави клетките почувствителни на оштетување и можеби објаснува зошто кај дел од пациентите болеста повторно се активира по период без симптоми.
Истражувањето го предводел Институтот „Волтер и Елиза Хол“ во соработка со Кралската болница во Мелбурн. Тимот анализирал околу 900 биопсии од 80 лица со и без IBD, а од примероците создал и органоиди – минијатурни цревни ткива одгледани во лабораторија.
Анализите покажале дека кај пациентите со IBD цревните клетки можат да бидат молекуларно „подготвени“ за умирање дури и кога нема јасни знаци на активно воспаление. Станува збор за нарушување во сигналите што ги регулираат различните видови клеточна смрт, а не само за последица од веќе настанатото воспаление.
Истражувачите ги следеле пациентите повеќе од две години. Кај оние со посилен сигнал за клеточна смрт била забележана и поголема веројатност за повторно активирање на болеста. Тоа укажува дека молекуларните промени можат да се појават многу рано – можеби меѓу првите чекори во развојот на ново воспаление.
IBD ги опфаќа Кроновата болест и улцеративниот колитис. Современите терапии можат да ги намалат симптомите и да донесат ремисија, но ризикот од повторно влошување останува различен од пациент до пациент.
Наодите, објавени во списанието Science, не значат дека веднаш е достапен нов дијагностички тест или третман. Сепак, тие би можеле да помогнат во развојот на почувствителни методи за следење на пациентите и во изборот на терапија според молекуларните особености на нивната болест.
За љубопитноста што нè поврзува.
Вашата донација помага науката да стигне до повеќе читатели.
Ви благодариме што ја поддржувате науката на македонски.
