Истражувачи од Државниот универзитет во Орегон развија експериментална терапија која кај глувци го намали туморското оптоварување при рак на белите дробови, а истовремено помогна да се спречи кахексијата – тешкото губење телесна тежина, мускули и масно ткиво што може да го придружува ракот.
Терапијата користи липидни наночестички за интравенозно доставување на информациска РНК (mRNA) до туморите. Наночестичките го носат mRNA-то за фолистатин, протеин поврзан со потиснување на растот на туморот и одржување на мускулното ткиво.
Според резултатите објавени во списанието Journal of Controlled Release, наночестичките се врзуваат за витронектин во крвта. Така, преку интеракција со интегринските рецептори, кои се особено застапени во белодробното ткиво и туморската средина, тие се насочуваат кон туморите.
Ова е важно бидејќи конвенционалните липидни наночестички по системска примена често се натрупуваат во црниот дроб наместо во целниот тумор. Во експериментот, новиот пристап постигнал приближно 2,5 пати поголемо намалување на туморското оптоварување во споредба со наночестички насочени кон црниот дроб.
Кај третираните глувци биле забележани и подобар внес на храна, одржување на телесната тежина и зачувување на мускулното и масното ткиво, без забележани несакани ефекти во студијата.
Сепак, станува збор за предклиничко истражување. Терапијата сè уште не е испитана кај луѓе, па ќе бидат потребни дополнителни студии за да се проценат нејзината безбедност и ефикасност пред евентуални клинички испитувања.
