Новите компјутерски симулации покажуваат како првите ѕвезди го осветлиле младиот Универзум и започнале да ги создаваат елементите од кои подоцна настанале планети и живот. Проектот MEGATRON ги следи овие процеси со досега невидена деталност.
Истражувањето го предводат научници од Универзитетот во Бат, во соработка со Универзитетот во Чикаго и Институтот за астрофизика во Париз. Во четири студии, објавени во The Open Journal of Astrophysics, тие ги комбинираат космолошките симулации со модели на зрачење, хемија и формирање галаксии.
Симулациите започнуваат со првобитен гас без тешки елементи, каков што постоел кратко по Големата експлозија. Моделите потоа го следат раѓањето на првите ѕвезди, нивното зрачење, експлозиите на супернови и ширењето на новосоздадените елементи, како јаглерод, кислород и железо.
Целта е да се поврзат две независни траги од раниот Универзум. Едната доаѓа од набљудувањата на најстарите галаксии со вселенскиот телескоп „Џејмс Веб“, а другата од хемиските отпечатоци зачувани во древните ѕвезди во и околу Млечниот Пат.
Според резултатите, поедноставените модели можат да го потценат влијанието на ѕвезденото зрачење и сложените хемиски процеси врз гасот околу галаксиите. Симулациите со висока резолуција откриваат структури што во таквите модели би останале незабележани.
„Џејмс Веб“ директно го набљудува младешкиот Универзум, додека древните ѕвезди служат како своевиден фосилен запис за тие рани настани. MEGATRON создава физичка врска меѓу овие два извора на податоци, овозможувајќи попрецизно тестирање на моделите за првите ѕвезди.
Проектот досега добил 40 милиони процесорски часа на британските национални суперкомпјутери. Истражувачите планираат уште подетални симулации, со кои ќе ги споредуваат теоретските предвидувања со новите набљудувања од „Џејмс Веб“ и со хемискиот запис во најстарите ѕвезди. MEGATRON започна во 2023 година и треба да продолжи до 2030 година.
